دهون البطن ..(منطقة الوسط عموما )

أولا :لازم نعرف ان مفيش حاجه اسمها نشيل دهون فى منطقة معينه بس ...ولكن الدهون بتتراكم فى منطقة الوسط لأن ده طبيعة جسم الانسان ومنطقة الوسط والارداف هما اكتر منطقتين قابلة لتخزين الدهون فيهما وطبعا الدهون بتتراكم فى المناطق دى لسببين

1- سوء التغذية ........2 - قلة الحركة

طبعا بالنسبة لسوء التغذية اكيد كلكوا عارفين ان ده بسبب اكل الوجبات الغنية بالدهون زى الوجبات السريعه.. والعك اللى حضراتكوا عارفينه

الحل ايه ؟؟؟

قولناه قبل كدا شبروميت مرة ....وهو نظام غذائى محترم يحتوى على البروتين والفيتامينات ..وكمية قليله من الكارب ..وشىء لا يذكر من الدهون على حسب ارشادات الدكتور او المدرب الشخصى بتاع حضرتك ..بشرط يكون فاهم

وطبعا مش هنسى افكركوا ان ده عايز (توتو) يعنى (جنود) يعنى (مونى) يعنى فلوس+ممارسة الرياضة إلخ ... ده النظام العام واللى اوقات نظام الاكل بيكون خارج عن ارادة الشخص ..بسبب حالته المادية
ـــــــــــــــــــــــــــــــــــــــــــــــــــــــــــــ
22 - نيجى بقى للنظام اللى انا بفضله وده نظامى الشخصى اللى فى متناول اى حد وايا كانت حالته المادية

اولا يا حلو :: عشان تخس دهون لازم لازم لازم تعلى معدل الحرق عندك ...يعنى جرى الصبح بدرى وتلعب نط الحبل (الكارديو بشكل عام) وده الافضل طبعا ....او تجرى فى الميعاد اللى انت عايزة وده على حسب ظروفك ..بس بشرط !! وهو انك تستمر وتلتزم

ثانيا يا برنس : لازم تتمرن بأوزان عالية فى الجيم ..عشان كل ما الكتلة العضلية زادت ...كل ما معدل حرق الجسم زاد ...كل ما نسبة الدهون فى الجسم قلت ...سيبك بقى من حوارات الوزن الخفيف والعدات الكتيرة ....لازم تلعب باتقل وزن تعرف تجيب بيه من 15 الى 20 عدة .

ثالثا يا حبى : ودى اهم حاجه والتمرين ده هو اللى هيخسسك بجد ....وهو تمرن السكوات بالبار او من غير ...والتمرين ده كفيل انه يخسس جسمك وانت فى البيت مش شرط تنزل الجيم...طبعا حضرتك بتسأل ليه ؟

انا اقولك ..عشان بتشتغل على اكبر عضلات فى جسمك وبتكون شبة بتمرن جسمك كله ..والتمرين ده بيحرك كتلة عضلية ضخمة جدا ..وبالتالى بتحتاج لطاقة عالية جدا .. وطبعا الطاقة دى اللى هى الدهون اللى فى جسمك ..وبالتالى جسمك هيحرق الدهون دى ..وبالتالى كتلتها هتقل وهتخس

رابعا يا غالى : حاول تظبط أكلك على قدر المستطاع ..ومفيش حاجه اسمها آكل وجبة كبيرة مرة او مرتين بس فى اليوم ...لالالا مفيش الكلام ده خالص ...ليه بقى ؟؟؟؟؟!!!

عشان جسمك هيتعود ع الجوع وبالتالى هيخزن الاكل اللى بتاكله على شكل دهون عشان يسفيد منها على مدار اليوم ...يعنى كأنك يا ابو زيد ما غزيت

الصح هو انك تاكل من 4 الى 5 وجبات خفيفه... وحط 200 خط تحت كلمة خفيفة

خامسا : ودى اهم حاجه اللى من غيرها ...الكلام ده ملهوش اى لزمه ... (الارادة) يا وحوش من غير الارادة واصرارك على هدفك هتكون شخص

اهم النقاط من اجل عضلات بطن اقوى

عضلات البطن ما بتتطلعش غير بتقليل نسب الدهون فى الجسم و تقليل كمية المية المحتبسة تحت الجلد..و ده مش هتوصله بالصدفة ده محتاج مجهود كبير..دى اهم النقط عشان توصل لعضلات بطن احسن

🔴كل بروتين كفاية..خلى الدايت غنى بالبروتين معتدل الكارب.. البروتين بيساعد على تخليق كتلة العضلات..و كل ما كتلة العضلات زادت كل ما زادت معدلات حرق الدهون

🔴خلى وجبة بعد التمرين غنية بالكارب زى البروتين..وجبة الكارب اللى بعد التمرين التقيل فرصتها انها تتحول دهون اقل بكتير..معدلات الخرق بتكون فى اعلى مستوى ليها بعد التمرين الشاق

🔴دخل الدهون الصحية فى اكلك..الدهون الصحية زى اللوز او المكسرات..الدهون الصحية بتساعد فى حرف دهون الجسم اصلا..بس بشكل غير مباشر عن طريق انها بتساعد فى تثبيط معدلات الانسولين فى الدم اللى بدوره هيقلل تكوين الدهون

🔴اشرب كميات عالية من المية..المية الكتيير مع تظبيط معدلات عالية من البروتين مع معدلات متوسطة و موزعة بذكاء من الكارب..و معدلات متوسطة من الدهون الصحية..هيساعدك على تحويل جسمك لآلة حرق للدهون فى ال ٢٤ ساعة..من خلال تنشيط الميتابوليزم بتاعك

🔴قلل كميات الكارب تدريجيا على مدار اليوم..وجبة قبل النوم لازم تكون فيها كميات كارب قليلة او معدومة..ابتدى اول اليوم بكارب عالى و قلل تدريجيا

🔴ابعد عن السكريات و الحلويات..بترفع الانسولين و الانسولين بيخزن فات

🔴قلل الملح قدر المستطاع..زيادة كمية الملح بتخزم مية تحت الجلد و بتبان كأنها دهون

🔴ماتتمرنش بطن كل يوم..تمرين العضلات كل يوم هيحرقها مش هيظهرها..اتمرن من يومين لتلاتة بس فى الاسبوع بطن..

🔴مافيش تمرين بيحرق منطقة محدده بعينها..يعنى مش كل ماتتمرن بطن هتنزل الدهون اللى عليها

🔴ماتلعبش الف عدة بطن..العب فى كل تمرين ٤ زوايا..كل زاوية ٤ مجموعات..كل مجموعة ١٥:٢٠ تكرار بمقاومة متوسطة

🔴غير زوايا البطن و استهدفها من كل مكان..زوايا علوية..و بطن سفلية و جانبيات

🔴الكارديو..من اهم الحاجات اللى هتساعدك تقلل معدلات الدهون..الكارديو احسن وقت ليه بعد التمرين او اول ما تصحى من النوم

🔴Hiit او high intensive interval training احسن و اهم من الكارديو و اقوى منه ١٠ مرات..التمارين دى بتعتمد على فترات راحة قليلة و تمارين متتابعة متتالية..بتعلى معدلات ضربات القلب و بالتالى بتعلى معدل حرق الدهون